Pese 399

Ua tala mai e le lagi Le mamalu o le Atua, Ua faaalia foi e le vanimonimo, Le galuega a ona aao.

O loo ta’u atu le upu E le tasi aso i le tasi aso, O loo faailoa foi le poto E le tasi po i le tasi po.

E leai se gagana E leai foi ni upu, E le lagona O latou leo.

Ua oo atu lo latou leo I le lalolagi uma lava, Ma a latou upu I tuluiga o le atulaulau.

Ua na tuu i ai le fale ‘ie mo le la O ia foi e faapei o se faatoafaiava ua sau mai lona afeafe; E fiafia o ia e pei o se tagata fitafita E tamoe i le ala.

O lona alu atu mai le tasi tuluiga o le lagi lea, Ua oo foi lana faataamilosaga i le tasi ona tuluiga E leai foi se mea e lilo, I lona vevela.

E sa’o le tulafono a le Alii, E faafoisia mai ai le agaga, E faamaoni poloaiga a le Alii, E faapotoina ai le ua faigofie.

E tonu feau a le Alii, E faafiafia ai le loto, E mama poloaiga a le Alii, E malamalama ai mata.

E mama le mata’u i le Alii E tumau e faavavau, O faamasinoga foi a le Alii E moni ia ma tonu uma lava.

E silisili ona lelei i le auro, O le auro e sili ona lelei e tele E sili foi ona suamalie i lo le meli O le meli, ua sisina ifo.

Ua apoapoa’iina mai ai foi lau auauna, E tele foi le taui pe a tausi i ai O ai ea na te iloa amio sese? Ia e faamagalo ia te a’u i agasala lilo.

Ia e taofi foi lau auauna i agasala faamaualuga, Aua nei pule ia ia te a’u, Ona sao ai lea o la’u amio, Ou te le nofo sala foi i le leaga sili.

Ia malie foi ia te oe upu a lo’u gutu, Ma mafaufauga o lo’u loto Le Alii e, Lo’u papa ma le na te togiolaina a’u.